डडेल्धुरा, कात्तिक ६ । रोजगारीका लागि युवा विदेशिने क्रम बढिरहेका बेला डडेल्धुराका केही युवा भने आफ्नै ठाउँमा पेन्टिङको काम गरेर आम्दानी गर्न थालेका छन्। खाली समयको सदुपयोग गर्दै सुरु गरेको पेन्टिङ पेसालाई उनीहरूले अहिले आम्दानीको माध्यम बनाएका छन्।

डडेल्धुराका शिवराज भट्टराई विगत ६ वर्षदेखि पेन्टिङको काम गर्दै आएका छन्। सुरुमा खाली समयमा काम गर्न थालेका उनले अहिले यसैलाई आफ्नो पेसा बनाएका छन्। उनका अनुसार पेन्टिङको कामबाट मासिक २० देखि २५ हजार रुपैयाँसम्म आम्दानी हुने गरेको छ। एक महिनामा करिब चारवटा घरको पेन्टिङ सक्ने गरेको उनी बताउँछन्। आठ जनाको समूहमा काम गर्दै आएका शिवराजले आवश्यकताअनुसार अन्य व्यक्तिलाई पनि पेन्टिङको सीप सिकाउने गरेका छन्। यद्यपि, बर्खायाममा भने एकदेखि दुई महिनासम्म काम बन्द हुने गर्छ।

यस्तै १९ वर्षीय दीपक भट्टराई ब्याचलर तहको पढाइसँगै पेन्टिङको काम गरिरहेका छन्। घरको आर्थिक अवस्था कमजोर भएकाले पढाइ खर्च जुटाउन आफूले काम गर्न थालेको उनी बताउँछन्। करिब सात महिनादेखि पेन्टिङको काम गर्दै आएका दीपक पढाइ र रोजगारीलाई सँगसँगै अघि बढाइरहेका छन्।

डडेल्धुराको अमरगढी नगरपालिका–७, पोखराका २९ वर्षीय चेत बिक पनि एक वर्षदेखि पेन्टिङको काममा संलग्न छन्। रोजगारीका लागि दुई वर्ष भारत बसेर फर्किएका उनले यहाँ आएपछि पेन्टिङको सीप सिकेर काम सुरु गरेका हुन्। आफ्नै ठाउँमा काम गरेर आम्दानी गर्न पाउँदा खुसी लागेको बताउने बिक अन्य युवालाई पनि सम्भव भएसम्म आफ्नै ठाउँमा काम गर्न सुझाव दिन्छन्।

सीप सिकेर आफ्नै ठाउँमा काम गर्ने हो भने रोजगारी र आम्दानीको अवसर सिर्जना गर्न सकिने यी युवाहरूको अनुभवले देखाउँछ। स्थानीयस्तरमै सीपमूलक कामलाई प्राथमिकता दिन सके युवालाई आत्मनिर्भर बनाउन र वैदेशिक रोजगारीप्रतिको निर्भरता घटाउन सहयोग पुग्न सक्छ।
 

बझाङमा ४८ वर्षीय पुरुष १२ दिनदेखि बेपत्ता

बझाङ, कात्तिक ६ । बझाङको बित्थडचिर गाउँपालिकाका एक पुरुष बेपत्ता भएका छन्। बित्थडचिर गाउँपालिका–८, जालिड उस्कला निवासी ४८ वर्षीय प्रयागराज अवस्थी

डडेल्धुरामा चौथो जय भूवन कप क्रिकेट यही कार्तिक १७ देखी हुँदै

डडेल्धुरा, कात्तिक ६। जय भूवन युवा क्लब नवदुर्गा –१ ऐरोडा डडेल्धुराको आयोजनामा चौथो संस्करणको जय भूवन कप जिल्ला स्तरीय खुला टी–२० क्रिकेट

पीएचपीमा सुरक्षा कमजोरी भेटिएपछि बैंकहरु पनि सतर्क

काठमाण्डौ, कात्तिक ६ । ‘पीएचपी’ प्रविधिमा गम्भीर साइबर सुरक्षा कमजोरी देखिएपछि नेपालका विभिन्न बैंक तथा वित्तीय संस्था पनि सतर्क भएका छन्