डडेल्धुरा, कार्तिक १४। १०औँ राष्ट्रिय खेलकुद प्रतियोगिताका लागि डडेल्धुरामा जिल्ला छनोट प्रतियोगिता सुरु भएको छ। आगामी मंसिर १६ देखि २७ गतेसम्म कर्णाली प्रदेशको सुर्खेतमा आयोजना हुने राष्ट्रिय खेलकुद प्रतियोगितामा सुदूरपश्चिम प्रदेशको प्रतिनिधित्व गर्ने खेलाडी छनोट गर्न प्रतियोगिता सञ्चालन गरिएको हो।

अमरगढी नगरपालिका–४ स्थित टुँडिखेलमा शनिबार प्रतिनिधिसभा सदस्य एवं महिला तथा सामाजिक मामिला समितिकी सभापति आकृति अवस्थीले प्रतियोगिताको उद्घाटन गरेकी छन्।

उद्घाटन कार्यक्रममा उनले खेलकुदमा महिला सहभागिता बढाउनुपर्ने र खेलकुद पूर्वाधार विकासलाई प्राथमिकता दिनुपर्ने बताइन्। अनुशासन, निरन्तरता र मिहिनेतले मात्रै सफल खेलाडी बन्न सकिने उल्लेख गर्दै उनले पदक जित्न खेलाडीको आत्मबलसँगै आवश्यक पूर्वाधार र लगानी पनि महत्वपूर्ण हुने बताइन्।

जिल्ला खेलकुद समितिका अध्यक्ष जगतबहादुर ऐरले प्रतियोगितामार्फत जिल्लाका उत्कृष्ट खेल प्रतिभाको पहिचान गरिने र छनोट प्रक्रिया निष्पक्ष बनाइने बताए। उनले खेलाडीलाई अनुशासित भएर प्रतिस्पर्धा गर्न आग्रह गर्दै जिल्लाबाट स्वर्ण पदक जित्ने खेलाडीलाई व्यक्तिगत रूपमा १० हजार रुपैयाँ पुरस्कार दिने घोषणा गरे।

उनले जिल्लामा आवश्यक खेलकुद पूर्वाधारको अभाव रहेको उल्लेख गर्दै त्यसको विकासका लागि सरकारले पर्याप्त बजेट विनियोजन गर्नुपर्नेमा जोड दिए।

कार्यक्रममा जिल्ला क्रिकेट संघका अध्यक्ष बासु जोशीले डडेल्धुराले पटक–पटक प्रधानमन्त्री र अहिले मुख्यमन्त्रीसमेत पाउँदा पनि खेलकुद पूर्वाधारको विकास हुन नसकेको बताए। जिल्लामा प्रशिक्षकको अभाव रहेको र खेलाडीहरू आफ्नै लगानीमा खेल जीवन अघि बढाउन बाध्य भएको उनको भनाइ थियो। उनले खेलाडीको भविष्य सुनिश्चित गर्न राज्यले ध्यान दिनुपर्ने बताए।

प्रमुख जिल्ला अधिकारी वेदराज फुयालले चुनौतीका बाबजुद खेलाडीले लगनशीलता, आत्मविश्वास र निरन्तर प्रदर्शनमा ध्यान दिनुपर्ने बताए। उनले खेलाडी छनोट निष्पक्ष हुनुपर्नेमा जोड दिँदै छनोट प्रक्रियामा आफ्नो विशेष निगरानी रहने उल्लेख गरे।

डडेल्धुरा जिल्ला खेलकुद समितिका कार्यालय प्रमुख डम्बरबहादुर भण्डारीका अनुसार प्रतियोगिताका १७ विधामा ४३५ खेलाडीले नाम दर्ता गराएका छन्। तीमध्ये २४८ खेलाडी प्रदेशस्तरीय छनोटका लागि सहभागी हुनेछन्।

प्रतियोगितामा भलिबल, खोखो, ह्यान्डबल, क्रिकेट, टेबलटेनिस, तेक्वान्दो, कराँते, बास्केटबल, उसु, कबड्डी, बुद्धिचाल, एथलेटिक्स, फुटबल, बक्सिङ, आईटीएफ तेक्वान्दो, बुदोकैदो फुलकन्ट्याक्ट कराँते र ब्याडमिन्टन गरी १७ विधा समावेश छन्।

यीमध्ये केही खेल महिला तथा पुरुष दुवै समूहमा र केही पुरुषतर्फ मात्र सञ्चालन हुनेछन्। जिल्ला छनोटबाट उत्कृष्ट हुने खेलाडीले सुदूरपश्चिम प्रदेशको प्रतिनिधित्व गर्दै सुर्खेतमा आयोजना हुने १०औँ राष्ट्रिय खेलकुद प्रतियोगितामा प्रतिस्पर्धा गर्नेछन्।

सुदूरपश्चिम रोयल्समा भित्रिए वेस्ट इन्डिजका आक्रामक ब्याटर शेरफन

अत्तरिया, कार्तिक ७ । नेपाल प्रिमियर लिग एनपीएलको तेस्रो संस्करणका लागि सुदूरपश्चिम रोयल्सले वेस्ट इन्डिजका आक्रामक ब्याटर शेरफन रदरफोर्डलाई

डडेल्धुरामा जिल्ला स्तरीय खुला पुरुष भलिबल प्रतियोगिता हुने

डडेल्धुरा, असोज १७ । डडेल्धुराको नवदुर्गा गाउँपालिका–१ कोटेलीमा बडादशैंको पूर्वसन्ध्यामा जिल्ला स्तरीय खुला पुरुष भलिबल प्रतियोगिता आयोजना हुने

डडेल्धुराको अजयमेरुमा भलिबल र कराते प्रतियोगिता हुँने

डडेल्धुरा, भदौ ३१ । डडेल्धुराको अजयमेरु गाउँपालिका –२ चमडामा रहेको विरवेताल देवताको जाँतको अवसरमा दोस्रो अजयमेरु महोत्सव आयोजना हुने भएको छ। यही