काठमाडौं, असोज १९। दसैँ–तिहार नजिकिएसँगै घर फर्किने यात्रुको चाप बढ्दा काठमाडौं–धनगढी हवाई भाडा पनि चर्किएको छ। सुदूरपश्चिमका नागरिकका लागि चाडपर्वमा घर पुग्ने हवाई यात्रा सामान्य समयको तुलनामा निकै महँगो बनेको छ।

अहिले काठमाडौं–धनगढीको हवाई टिकटको मूल्य २२ हजार रुपैयाँसम्म पुगेको छ। नेपाल नागरिक उड्डयन प्राधिकरणले यो रुटको अधिकतम भाडा २१ हजार ६ सय रुपैयाँ तोकेको छ। तर, एयरलाइन्स कम्पनीहरूले २२ हजार १८० रुपैयाँसम्मको टिकट बिक्री गरिरहेका छन्।

सामान्य अवस्थामा काठमाडौं–धनगढीको हवाई भाडा १० हजार ८ सय रुपैयाँ हुने गरेको थियो। तर, चाडपर्वको समयमा उक्त दरमा टिकट पाउन मुस्किल भएको एयरलाइन्स कम्पनीहरूले बताएका छन्। धनगढीस्थित एक एयरलाइन्स कम्पनीका अधिकारीका अनुसार सोमबारसम्म १० हजार ८ सय रुपैयाँका केही टिकट उपलब्ध भए पनि मंगलबारदेखि न्यूनतम भाडा नै १५–१६ हजार रुपैयाँ पुग्नेछ।

विमान कम्पनीहरूले भने चाडपर्वका बेला यात्रुको चाप एकतर्फी हुने भएकाले भाडा बढ्ने गरेको बताउँदै आएका छन्। काठमाडौं हुँदै धनगढी जाने यात्रुको संख्या धेरै हुने तर धनगढीबाट काठमाडौं फर्किने यात्रु तुलनात्मक रूपमा कम हुने भएकाले भाडा समायोजन गर्नुपर्ने उनीहरूको तर्क छ।

प्राधिकरणले निर्धारण गरेको अधिकतम भाडासम्म लिन पाउने व्यवस्था रहेको एयरलाइन्स कम्पनीका अधिकारीको भनाइ छ। धनगढी विमानस्थलका प्रमुख महेन्द्रबहादुर सिंहले भने प्राधिकरणले तोकेको अधिकतम भाडाभन्दा बढी रकम लिन नपाइने स्पष्ट पारेका छन्।

सुदूरपश्चिमका नागरिकका लागि हवाई भाडा महँगो भएको विषय भने नयाँ होइन। सामान्य अवस्थामै काठमाडौं–धनगढी हवाई भाडा देशकै महँगोमध्ये पर्ने गरेको छ। यही विषय प्रतिनिधिसभामा समेत पटक–पटक उठ्दै आएको छ।

अघिल्लो साता राष्ट्रिय स्वतन्त्र पार्टीकी सांसद आकृति अवस्थीले काठमाडौं–धनगढी हवाई भाडा घटाउन माग गरेकी थिइन्। उनले भारतको राजधानी दिल्ली पुग्नभन्दा आफ्नै देशको सुदूरपश्चिम पुग्न हवाई भाडा महँगो भएको भन्दै सरकारको ध्यानाकर्षण गराएकी थिइन्।

चाडपर्वका बेला घर फर्किने यात्रुको चाप बढेसँगै हवाई भाडा थप महँगिन थालेपछि सुदूरपश्चिम जाने यात्रुका लागि यसपटकको दसैँ घर फर्काइ थप महँगो बन्ने देखिएको छ।

सुरु भयो थारु समुदायमा दसैंको तयारी 

धनगढी, असोज १९। कैलालीका थारु समुदायमा दसैंको तयारी सुरु भएको छ । माटोको कच्ची घर सफा, सुग्घर बनाएर चाडपर्व मनाउने यो समुदायका मानिसले घर लिपपोतको

सुदूरपश्चिमका २७ स्थानमा यात्रु सहायता कक्ष स्थापना

महेन्द्रनगर, असोज १९ । ट्राफिक प्रहरीले नजिकिदै गरेको बडादशै , तिहार लगायतका चाडपर्वलाई लक्षित गरी सुदूरपश्चिम प्रदेशका २७ स्थानमा यात्रु सहायता

स्वास्थ्य बीमाका लागि पुस १ गतेदेखि राष्ट्रिय परिचयपत्र अनिवार्य

काठमाण्डौ, असोज १९ । स्वास्थ्य बीमा बोर्डले आउँदो पुस १ गतेदेखि स्वास्थ्य बीमाका लागि राष्ट्रिय परिचयपत्र अनिवार्य गरेको छ । बोर्डले सूचना निकालेर